Ermənistan hakimiyyəti onlara yaxın olan KIV ilə xalqın qarşısında xal qazanmaq məqsədilə Çeçenistan Respublikasında keçirilən snayper yarışlarından ER MTX-nin xüsusi təyinatlı komandasının guya kubok ilə qayıtmasını yayımlayıb.

Yenixeberlenti.com Axar.az-a istinadən xəbər verir ki, Çeçenistan KİV-in məlumatlarına əsasən, Ermənistan MTX-nin snayper komandasının 20-ci, yəni sonuncu yer tutması erməni ictimaiyyəti tərəfindən birmənalı qarşılanmayıb və narazılığa səbəb olub.

MTX-nin uğursuzluğa uğrayan rəhbəri Artur Vanesyan ölkə rəhbərliyi qarşısında hər vəchlə öz imicinin qorunub saxlanmasına çalışır.

Belə ki, snayperlərin kubokla qayıtmasını yayımladan A.Vanesyan bundan daha bir gün əvvəl “qəhrəmanlıq nümunəsi göstərmək” məqsədilə 2018-ci ilin iyun ayında guya Azərbaycan əsgərinin erməni snayperi tərəfindən vurulmasını göstərən videodan istifadə edərək yeni xəbər kimi tirajladıb. Erməni sosial şəbəkə istifadəçiləri isə bu xəbərin qurma olduğunu anlayıb və öz şərhlərində ciddi tənqid ediblər.

Bununla kifayətlənməyən A.Vanesyan sosial şəbəkələr vasitəsilə guya 7 il ərzində Azərbaycan xüsusi xidmət orqanlarının Ermənistana qarşı casusluq fəaliyyətini aşkar etdiyini paylaşıb, lakin casusluqda ittiham olunan şəxslərin adını açıqlamayıb.

Erməni sosial şəbəkə istifadəçiləri bu hadisənin də Vanesyanın qurması olduğu qənaətindədirlər.